O nisi nei o Faalupega a Nu'u, o lo'o aumai a latou fa'asalalauga i luga o le leitio ma le Upega Tafailagi mo le silafia e Tupulaga lalovaoa a Samoa i soo se tafa o le lalolagi. Ua faavaeina lenei lagona i se tala na fai mai ai se tasi toeaina Samoa ia te a'u, o le tagata lava o le va, ma o se va'a fo'i ua mafa tautai e faapea-: "Ua fiu e a'oa'o ma fai aoga a alo ma fanau o le aiga i le faa-le-aganuu ma le faa-Samoa, ae fai mai e mumusu, e le manana'o i ai, e le fiafia foi i ai.    Peitai e le galo se tasi o fasi fuitau e faapea-: O le'a ou alu i le tu'ugamau ma ia mea e tele, ae a fai mo ai?" O le mea lea ua toe sasa'a ai le fafao, ma toe timata le upega, aua a solo le falute ma tafea pulu i le vai  o Sina, ona le toe iloa ai lea o le mafuaaga e ese ai Samoa ma lana aganuu, ma gigi faatasi ai tatou ma le lalolagi, ma le iloa ai le tatou Tofi mai le Atua.   O lea ou te faamalulu atu ai Samoa i ou paia sausaugata e amata mai le Tai Samasama o le Tuiman'ua seia paia le Lualoto o Alii . O paia o Tama ma o latou Aiga, o Aiga foi ma latou Tama. Le usoga a Pule ma Tumua, Ituau ma Alataua, Aiga i le Tai ma le Vaa o Fonoti. Ae tainane foi uso tuofe ia Amerika Samoa i le latou nofo tapuai mai. ....Le paia ia Sua ma le Vaifanua, Fofo ma Aitulagi, Saole ma Saleaumua ma le Launiusaelua. Faapea foi faatui o le motu ma Auvaa o Tootoo o le Faleula ma upu i Tama o le Manu'atele. 

Ia faamlulu atu pe afai ua faiva ese Lopepe i sau silasila ma sau faitau i faalupega a nuu o loo i lalo. O nai faamaumauga lava sa aoao manogi ai le tatou polokalame mai tupu ma tamalii, failauga foi ma le aufaitofa a afioaga ma nuu e tuuina mai mo a latou faasalalauga i Sini Ausetalia.

Tatou faamoemoe ia i le manulele o le tiotala, e pei o le fetalaiga ia Malietoa ma Su'a i le la sailiga malo ia Nafanua. Tatou sapaitali le faamoemoe i le Agaga Paia e ta'ita'i ai le tatou atunuu i le Manuia.

UPOLU - (Tumua)

Lalomauga:  Afio Afoa ma le matua ia Lefaoseu, Susu le Tagaloamatua, Susu foi Lufilufi ma le Toaono ma le matua o Tima Tagata.....fr: Afoa Vaemoe, Faasoo Lemauga Malaki, Fiaseu Isaia Tagaloamatua 03Mar2007

Fasitoo-Uta: Afio o le Aiga Satuala, o le Aiga Faalagilagi. Susû Sa Aionô, Afifio le Aiga Sa Leaupepê. Susû Su'a le Ma'opû, Susû Toleafoa ma le Ta'auso. Alalata'i lau Tofa le Tuua ma le mamalu i le Falefitu, ma le nofo a Ituaiga; ma lau fetalaiga igoa matua Tauauve'a...........fr: Leaupepe Matautu 26Oct2008

Matatufu:  Afifio o Alalamaota ma Sa'o ma le Usoalii, le mamalu i le Falefa o Saleapaga ma Leituala. Afio Fiame le Sa'o Fa'apito ma le Aiga Paia Salevalasi, Alalata'i i laua na Aliimau o Faleupolu ia Faatili ma Lemauga, Susû Sitagata ma le aiga Sa Sitagata ma le mamalu i le Faleatua........  Aumai ia Tamausu Sanele Patolo 18 Oketopa 2008

Poutasi Falealili: Afifio le paia ia Tuatagaloa ma Meleisea ma le Usoalii, le mamalu ia Lufilufi ma le Taulauniu........ Aumai ia i latou ia Lupeamanu Fata Faaoli, Aliamanaia Kosema Tumanuvao & Nofoituaiga Pine Viane 24Me2009

Siumu: Afifio Sa Asomua ma Aiga e lua, Tuu'u ma le Aiga Sa Tuu'u, le Falelua o Tulafale, Fofoga o le Alataua Li'o; Uta'ileuo ma le Faletolu....fr: Tuuu F. Nonu, Tupuola Vaega, Sooaso Unasa Mase 07Mar2009

Utualii: Afio le Ma'opu, afio le Aloalii. Afifio Usoalii, Alalata'i oe le Si'ufanua ma le mamalu i le Faletolu ma le Gautaala........fr: Maaolegalu Maiava 14Mar2009

Satuimalufilufi: Afifio aloalii faapea le Tamaitai. Afio le matua taulagi ia Taito, Alalatai le matua ia Peipeigamalie ma le latou toafa. Maliu mai le talifetalaiga ia Tuagalu ma le mamalu ia te oe Satuimalufilufi...fr: Tuifaasisina Pausisi Tauiliili, Leatigaga Faasee Tauiliili & Sefo Foisiva Tauiliili   Sept2009

Saaga: Afio le Maopu ia Tafilipepe, Afio Tupuola ma Leatigaga, Alalata'i lau fetalaiga Uta'iileuo ma le Faletolu. Afio Sa-Asomua ma aiga e lua, Tuu'u ma le Falelua o Tulafale. Fofoga o le Alataua Li'o...fr: Tupuola Saini Vaega, Mano lotolelei & Pasetalia Matai'a   14Nov2009

Matautusa i Apia: O le afifio a tama Alo Sina ma le aiga paia o Salevalasi, Matua ma Usoalii ma aiga Sa-Malietoa, ao se alalafaga o le Faletolu ma le Vainalepa lo la toalua ma le susuga iaTuisamau...fr: Tauiliili Senio Pupualii, Su'emalo Vaavae Aiono, Leota Leuluaialii Fuivai Amituanai, Fepuleai Afa Pupualii, Toomata Falelimu Wilson & Lefau Tovia Siaki Pupualii 17Jan2010.

Vaigaga Faleata:  O le paia lava lea i le Susu o Seiuli le alo o Malietoa, faapea le falefia o Alii ma le fetalaiga a Ulugia..... fr: Ulugia Aufai Fetuao, Poinsettia Taefu-Penn Lepupa Anae, Tuilaepa Ulugia Lessie Petaia 11Feb2010.

Lufilufi: O le Paia lava lea i le Toaono ma le Saofaiga, Susu Tupa'i ma le Afioga i le Tamaitai fa'apea le Fa'alufilufiga.......  fr: Faamatuainu Viiga, Toga Utuai, Mataafa Tima 21Mar2010

Pata Falelatai: Paia lava lea o le Falefitu o le Aiga Tauaana ma le latou Tama. Afio Taiivao na falefia i ai Aiga, le mamalu ia te oe Galu e Fa ma Tagata o le Vavau. Faapea Vaeolenofoafia ma upu ia te oe Falelatai.......fr: Ti'eti'e Timo, Ti'eti'e Faalavaau Muliaga, Nanai F. Matuaiala.... 21Mar2010 

Si'ufaga Falelatai: Paia lava lea o le Falefitu o le Aiga Tauaana ma le latou Tama. Le mamalu ia te oe Galu e Fa ma Tagata o le Vavau ma upu ia te oe Falelatai.......fr: Taefu Tai Taulaga, Taefu Nofoaga, Taefu Pilitati & Fa'alavaau Matuaiala.... 27June2010  

 

SAVAII - (Puleono i Salafai)

Avao: Afifio aiga Sa-Peseta, afio le Ma'opu o Leota, alalata'i le Faleiva ma le nofo a Usoalii ma le mamalu ia Matautu...from: Leota Taeao Leota ma le Aiga Sa-Leota Avao 28Dec2005

Samauga: Afifio Sa'o e fa Afifio Aiga Sa-Peseta, maliu mai lau fetalaiga So'oalo ma le Falefa o Samauga....from: Seve Sooalo, Pula Pepe & Fui Lokeni 02Me2009

Lalomalava: Afio Gatoloaifaana, Afio Taito ma Usoalii ma le matua, Maliu mai Sa Fuamua ma le Nofo a Ituaiga ma le Faletolu.....fr: Talisau Tupai 17Apr2009

Lano: Afifio le aiga Satuala. Susu mai lau susuga Iiga, Susu Su'a ma alo o Vaafusuaga, Maliu mai lau fetalaiga Malaeulu ma le mamalu ia te oe Salemuliaga...fr: Melesete Vui (tina matua ole nuu i Sydney Ausetalia)  05Me2009

Tafua:  Afio Taufa'asisina ma Alaala Matuatala, Maliu mai lau Tofa Lemaota ma lau Fetalaiga Leûlu, ma le mamalu ia To'iloto....fr: Lemaota Iosia, Lemaota Aso, Lemaota Sione & Aiga Sa-Lemaota i Tafua 05Ianuari2009

Lefagaoalii: Afifio alo o Peseta Tuiaana Tamaalelagi. Le falefa o Sa'o, Le aiga Sa-Peseta, Le falefa o Samauga ma le la falelua ia Safune...fr: Pula Lolua Pepe, Vaele Ilalio, Vaele Aperaamo, Vaele Feagaiga, Pa'o Simone, Gafatasi Poakio & Siliato Vaele 27Sept2009

Foalalo: O le paia lava lea aua le afifio o tapaau, le paia o Sa-Lilomaiava, le mamalu i le Falelua ma le igoa o Gaga'emalae o le tama e tasi o Faleupolu ma lo ta nuu i Samoa...fr: Taupamatu'u Peni Faliuga & Fonomalii Faalafitele & Fonomalii Sene 16Ianuari2010

Sili: O le paia lava lea aua le susu o le Tagaloa ma le paia o le afio o aiga sa Amituana'i, i le susuga i le Gafa mamalu ia Safune ma Taulauniu. O oe lava o le Fale-upolu o tofiga a le Tupu...fr: Fiu Faaofonuu Tuiipala & Mafutaga alo ma Fanau o Sili Sydney Australia 25July2010

 

to be continued

 

webmaster tpmaiava: mail@fofogamoomiasamoalive.com